Pacific Gas and Electric (PG&E) anonse li pral devlope twa pwogram pilòt pou teste kijan machin elektrik bidireksyonèl (EV) ak chajè yo ka bay elektrisite nan rezo elektrik la.
PG&E pral teste teknoloji chaje bidireksyonèl nan plizyè anviwònman, tankou nan kay, biznis ak avèk mikwo-rezo lokal nan distri ki gen gwo menas dife (HFTD) yo.
Pilòt yo pral teste kapasite machin elektrik la pou voye kouran tounen nan rezo a epi bay kliyan yo kouran pandan yon pann kouran. PG&E espere rezilta yo ap ede detèmine kijan pou maksimize rentabilité teknoloji chaje bidireksyonèl la pou bay sèvis kliyan ak rezo a.
“Pandan adopsyon machin elektrik yo ap kontinye grandi, teknoloji chaje bidireksyonèl la gen yon gwo potansyèl pou sipòte kliyan nou yo ak rezo elektrik la an jeneral. Nou kontan lanse nouvo pilòt sa yo, ki pral ajoute nan travay tès nou deja fè yo epi demontre posiblite teknoloji sa a,” te di Jason Glickman, vis prezidan egzekitif PG&E, jeni, planifikasyon ak estrateji.
Pilòt rezidansyèl
Atravè pilòt la avèk kliyan rezidansyèl yo, PG&E pral travay avèk konpayi otomobil yo ak founisè rechaje machin elektrik yo. Y ap eksplore kijan machin elektrik lejè pou pasaje nan kay unifamilyal yo ka ede kliyan yo ak rezo elektrik la.
Sa yo enkli:
• Bay kay la kouran sekou si pa gen kouran
• Optimize rechaje ak dechaje machin elektrik yo pou ede rezo a entegre plis resous renouvlab.
• Aliyen chaje ak dechaje EV yo ak pri akizisyon enèji an tan reyèl la
Pilòt sa a pral ouvè pou jiska 1,000 kliyan rezidansyèl ki pral resevwa omwen $2,500 pou enskripsyon yo, epi jiska $2,175 anplis selon patisipasyon yo.
Pilòt biznis
Pilòt la avèk kliyan biznis yo pral eksplore kijan machin elektrik mwayen ak lou e petèt lejè nan enstalasyon komèsyal yo ta ka ede kliyan yo ak rezo elektrik la.
Sa yo enkli:
• Bay bilding lan kouran sekou si pa gen kouran
• Optimize chaje ak dechaje EV pou sipòte ranvwa amelyorasyon rezo distribisyon an
• Aliyen chaje ak dechaje EV yo ak pri akizisyon enèji an tan reyèl la
Pilòt pou kliyan biznis yo ap ouvè pou apeprè 200 kliyan biznis ki pral resevwa omwen $2,500 pou enskripsyon yo, epi jiska $3,625 anplis selon patisipasyon yo.
Pilòt mikwogrid
Pilòt mikwo-rezo a pral eksplore kijan machin elektrik yo—kit se machin lejè kit se machin mwayen ak lou—ki konekte nan mikwo-rezo kominotè yo ka sipòte rezistans kominote a pandan evènman koupe kouran pou sekirite piblik la.
Kliyan yo ap kapab dechaje machin elektrik yo nan mikwo-rezo kominotè a pou sipòte kouran tanporèman oubyen rechaje yo nan mikwo-rezo a si gen twòp kouran.
Apre premye tès laboratwa yo, pwogram pilòt sa a pral ouvè pou jiska 200 kliyan ki gen machin elektrik ki nan zòn HFTD ki gen mikworezo konpatib yo itilize pandan evènman koupe kouran pou sekirite piblik la.
Kliyan yo ap resevwa omwen $2,500 pou enskripsyon epi jiska $3,750 anplis selon patisipasyon yo.
Yo prevwa chak nan twa pilòt yo ap disponib pou kliyan yo an 2022 ak 2023 epi y ap kontinye jiskaske ankourajman yo fini.
PG&E espere kliyan yo ap kapab enskri nan pilòt lakay ak biznis yo nan fen ete 2022 a.
Dat piblikasyon: 16 Me 2022